1
دولوبدو….
دولوبدو كۆتله بو كنده شهر كيمين دير ائله
یالان دی بوردا باخيشلار قهر كيمين دير ائله
چمن لرینده بنؤوشه سولوب بوياق چئويريب
و اورمانین دا آغاج لار كهر كيمين دير ائله
آماندى…ديل لر اليندن چاتيب دوداق‌لارا جان
كى سؤزلرينده كینايه زهر كيمين دير ائله
ايتيبدى تانرى آدين گل !! ياراتدیغین دانيلیر
گئجه كيمين دى سوروش بير سحر كيمين دير؟ائله
کسیر توش اولسا ماليندان قولاق كسن چوخالیب
منيمكى اولسادا اولسون يا هر كيمين دير ائله!!
گؤرن كى دوغرو دور ‘حسرت’؟ قاراباسیر یا بیزی!
دولوبدو كۆتله بو كنده شهر كيمين دير ائله
2
#داريخير
قاپ_قارانليق دى شەهر يايغین ايشیق لار داريخير
اوستونو غم بوروموش گؤى ياراشیق لار داريخير
وساواش ديرسا قيلینج كيمسه كى هاى_كوى سالاراق
بو بوزومتول دؤيوشه آل باريشیق لار داريخير
بوردا ساز تـوزلو قاوال چانتا دا چالمير بالابان
پينتى غم لر بورويوب شهرى آشيق لار داريخير
خيـاوان لار باغيرير دردلى شـەهر آغلاياراق
كوچه لر دام يولولار دار _دولاشیق لار داريخير
مور بوياق مورگو باخيش غمله بولانميش بيرينه
بو يوموق فلسفه دن تام دانيشیق لار داريخير
بوراخيب كندى گونش شـوقونا گلمه بورا سن!
قاپ قارانليق دی شەهر يايغين ايشیق لار داريخير
3
بئله بیر گون چاتاجاق
بئله بير گون چاتاجاق،چاى سوناسين سايماياجاق
چيمچه شيب ليغلى بولاق،ياز ناناسين سايماياجاق
آتـا لار يول ايتـيرب ،آزغـين اولار ائو _ ائـشيگه
حاياتی قاپ _ باجاسى ، آستاناسين سايماياجاق
بالا نارين بـوْى آتيـب ، تئز داناجاق امديگينى
ييغاجاق سـئوگى يوكون ، اؤز آناسين سايماياجاق
و او چـاغ سايغى ايتر ،اؤلگون اولار دب لريميز
اوبالار ياس ساياسين ، توى خيناسين سايماياجاق
گئده جك ائيرى يولو ، كور ساياغى كيم سونونا
او يولون داش بورانين ، فيرتيناسين سايماياجاق
تانرى بيردن سوساجاق ، دونيانى اوچقون ائده جك
مچيدى ، كعبه سى نى ، ميخاناسين سايمایاجاق
كؤچه جك ‘حسرت’ ايله ، بــوردان آزادليق قوشودا
و بو قان چايلى ائليم ، سون_سوناسين سايماياجاق
4
سؤيودوم
قوتارسا قیش کئچه ریک بیرده یاز یایا سؤيودوم
ياشيل ليق آنلاياريق شاختا قيش قويا سؤيودوم
گلن بو تیرچی بئیین بالتاسی آجیندان اؤلور
وورار کؤكون هادير اول اوندا يوخ حایا سؤيودوم
ديبينده كى بيزى ده سن اونوتما گؤر او زامان
چاتیرسا سنده کی بوی اولدوزا آیا سؤيودوم
لاخاندا کی یووا لار ایندی بوش قالیب بیلیرم
تاپیلماز هئچ کیمی بو آغرى نى سایا سؤيودوم
سنه گؤره قاييدار سئرچه لر گلر بورایا
گلر باهار ساری قوش حسرتین سویا سؤيودوم
ياخان سازاق الینه دوشسه دؤز اونا قاداسى
اومودلو اول چاتاریق بیرده یاز یایا سؤيودوم
5
سس آتین!
سس آتين! بلكه بو سس بيرليگی گلسین بو کارا
سس آتین بلکه بیری بیزلری بوردان آپارا
بیچیلیب باختیمیزین أگنینه یاس اویخولاری
بيزى هاردان گؤتوروب تانرى گتیرمیش گؤر هارا
بیز آرین سئودالاری آختاریریق آمما آمااااان…!
بورادا سئوگی آدی هرزه یازیلمیش دووارا
بیری‌سی هۆرمه‌ده بیز بوردا سانیردیق ساواشیر
چالیشیرمیش یاخاسین قانجیق ألین’دن قوتارا
نه‌یه دۆزگۆنلۆگ آدین هاممی بلشدیردی بئله
دویمادیق دۆزلۆگۆ بیز اینسان آرا-اینسان آرا
کیمی ساغ دیر کار اولوب، کیم ده کی کار دیر سادا کور!
یوخدور اینصاف آتیلیر ساغ کورا کورلار دا کارا
سیز قالیرسیز دا قالین آمما سیز آللاه سس آتین
سس آتین تانری منی سیزلر ألین’دن قوتارا
6
کوچه
کوچه اؤلگون کوچه دردلی کوچه حسرتله دالغین دیر
کوچه آرغین کوچه یورقون کوچه داش باشلی خالقین دیر
ساواش دیرها دؤيوش دير ها ساغين دؤن سن دؤنوم لردن
اؤته ك دن دار باخيش لار لا گودن لر بوردا قالقین دیر
كيمى چیخسا اؤنه بوردا يوزه سؤيلنجه آردیندا
كيمى ديل لى كيمی ديلسيز هامى قارغيشلى چالغین دیز
قارانلیق دیر ایشیق یوخدور کدر مئه دک بورا چؤكموش
بوغازلار غملي گونلرده بوغوز لان چوخلو دولغون دیر
یئری کوللوک دو یوخ یوخ یوخ یئری جمدکلی دیر یوخ یوخ
یئری چاتداقلی قانچیل دیر دووارلار قانلا آلقین دیر
الیم آغزیم اؤنونده ييدى بير هاى باسديم بورا گلمه
کوچه اؤلگون کوچه دردلی کوچه حسرتله دالغین دیر
7
شعيرلريمده….
شعيرلريمده آغیر دردلى عیصيانیم دیله نير
بو ياسلى شعره ياغيش لاختالیقدا قان اله نير!
.. و فـیرتینا ، دلیسووليق قانیمدا قانلارکن
باشیمدا اینتیقام آدلی قیصاصدی پؤهره له نیر
منم بو من آدیمی، وولکان آندیمیم داکی قیز
ساواش اؤلوم هاواسیندا…کؤز آلتی كول پوله نير
بیر ایت کؤپوکلو هاوارلاردا هئی قاپیر اؤزونو..!
بیر ایت باشين یئیه رك ! دؤنگه لر ده هئى سوله نير
گؤزونده گؤزله سن آللاه منـی بو شـعریم اوچون
الیمده کلمـه جه‌ییمدیـر دوماندا پلمه له نير
منم بو سوچلوجا میصراعلاریملا … قاندی گئدیر
منم یارام _ ياراسين باغلاماق دا دوز چيله نير
قـارالتی لار بورويوب سؤزجویون گونش لیگینی
شعيرلريمده آغیر دردلى عیصيانیم دیله نير
